Revelation of John 21
Loxotolo Ilou Lia Alavua
1 aIoxe eni emaisou mimii ne mukalu la emaisou loxotolo ilou lia alavua. Loxotolo ilou lia tei ne tasiauxu avile mo luaki kalumo uxolu la uasi. 2 bMo emaisou tuala Tavuna tatila noxou Lataua anu Ielusalemu alavua molu noxou Lataua teitexi no loxotolo ululu'e. Anu tokolomoxu ne lailaixe manina loxo sema itokolomo no anu tokolomo lailaixe sou taula'i mo ixolu ilooxu mulue sou une'e. 3 cMo elomusou 'ava vile tatila molu no anu puloulou noxou Lataua mu'ava aloxo 'o, “Namaisou, tani alelaxu noxou Lataua a mune'e muxolu no taine'i ta mitema no lia 'o mo ilo'a ixolu. Mo ane'i ixali ta mitema noxou xe Anu uxali Lataua noxi'a. 4 dAnu uiasou ie'i lexaxu mo soli ilou opo tu'utu'umaxu mo tama xe navunavu la uasi, xo anu mimii sou tei ne anu mukalu avile.”5 eMo itema e muxolu no puloulou ne muvikala aloxo 'o, “Namaisou, eni a'oxonu mimii alavua mukalusi.” Xe mukalu la muvikalaleli la lexe, “Nakaukavunu vaivaikala ane 'o xo vaivaikala ane 'o ne maninasou mo umomomo sou itema umuxaxu tanu no anu.” 6 fMo Anu muvikalaleli la aloxo 'o “Eni ekalusou xaixai noxilo, xo eni tei mo kaluxusou. Mo eni soko'u mimii xe eni kaluxusou mimii. La sou anu ane usoliu lexa sou uiexu la eni alosou lexa no anu pupulu sou mauli la anu uiexu la ulotonu uasi. 7 gLa sou lexe anu ane ua'ulixu 'oto'oto la anu uno'u mimii ane 'o mo eni axali Lataua noxou xe anu uxali 'alixeni. 8 hIa ane'i ane i'umekea ilo'a ane'i ane imuxaxu tane'i uasi mo ane'i ane i'oxonu 'ili'ilixo e masumasua manina mo ane'i ane ive'a ta mitema isoli ilou i'oxonu 'ili'ilixo masumasua sou vote'i mo ane'i ane i'oxo'oxonu saa masumasua iouiou mo ane'i ilotu noxi'a ta mimii vulaulau mo ane'i ane ivikala la ikalakalavoi ne tualasi'a ane navu kupaxu e navu u'ani'ani mo taupea. Anu soli ta tameisou ane.”
Ielusalemu Alavua
9Ioxe vile noxi'a ta angelo muxatele tamei e mino'u tavulu sou tu'utu'umaxu noxou Lataua kaluxusou muxatele tamei ne mune'e la muvikalaleli aloxo 'o, “Nane'e mo alosienixe Sipsip 'Olu semau sou u'uluxe.” 10 iEni e'ana'ana no anu xaviinu Uleenu Tavuna la elai no anu Uleenu la angelo ne mukasi noxilo la noxou telai no laxa'ilu tatila vile kisou teitexi. La mulosielixu Ielusalemu Tuala Tavuna tatila molu noxou Lataua teitexi no loxotolo ululu'e. 11 jLa lamanaxu Lataua mukakaa no tuala tatila ne la lamanaxu e uieiei ne iouvilemo manina loxo lavo'o vile lailaixe manina mo ilotonu la lamolisou toxoxa'a mo loxo lavo'o vile lailaixe ilemo lexe iasupa malemalenga xe ulamilami loxo 'o latitilo. 12 kMo vimelu toxoxa'a mo veveeni mulai teitexi muxoxosou tuala tatila ne mo aitengaxu mavulovexa mo mulu'e no lia tamei xe ta angelo vilevilesi mitulu mimomoxu aiaitenga ne. Mo mikaukavunu ualasi'a ta matamata mavulovexa mo mulu'e no lia tamei noxi'a ta Isilaeli no anu aitenga ne. 13No xalee vimelu telo 'ole la aitengaxu tatalu mo lu'e 'ole aitengaxu tatalu mo no xaleenu to'o 'ole la aitengaxu tatalu xe no xaleenu vaxa 'ole la aitengaxu tatalu kalumo. 14Mo mimuxaxu lavo'o kulu sou vimelu tava'u mavulovexa mo mulu'e no lia tamei sou vimelu sou tuala tatila ne uai utelo la usiatoto no anu. Lavo'o kulu mavulovexa mo mulu'e no lia tamei ne ualaualasi'a ta mitema sou xaixai noxou Sipsip 'Olu mavulovexa mo mulu'e no lia tamei muxolu no anu. 15 lMo angelo e uvivikalaleli ne muno'u tilovo vile mi'oxonu no anu xoulu sou utilovosou tuala tatila ne no anu ilou aiaitengaxu mo vimelusou. 16Mo no anu tuala tatila ne la no xalee tami'a mo ne mitilovosou la lovaxu iouvilesisi. Veveeninu mo toxoxa'a no anu ne mo veveeni utelai teitexi ne anu mulovaxu la itiitisou lova ne iouvilesisi mumomomo loxo lova 2,220 (kilomita). 17Mo mulovaxu komuko no anu vimelu ne la lovaxu mumomomo loxo mita itemaxu tatalu mo ta'uve (65 mita). Angelo muno'u lova ne loxo noxi'a ta mitema inono'u sou ilovaxu mimii no anu. 18 mVimelu ne mi'oxonu no anu lavo'o vile lailaixe ilemolu lexe iasupa xe tuala tatila ne mi'oxonu no anu xoulu la ulamilami loxo latitilo. 19Mo no tava'u vimelu ne la mitokolomonu no anu lavo'o se'i lailaixe manina. Lavo'o ane mimuxaxu tei manina ane ilemolu lexe iasupa mo ta tameisou ne lavo'o vile 'ela'ela ilemolu lexe sapaia mo lavo'o tatalusou ilemolu lexe xalukedoni mo lavo'o tami'asou ne kaukavuxu vevesinu ilemolu lexe emeralu. 20Mo lavo'o ta'uvesou ne lavo'o kaukavuxu lauolauoinu xe kea mu'umu'unalaxu ilemolu lexe saludoni mo muxatele vilesou anu lavo'o lauolauoinu ilemolu lexe koniliani mo muxatele tameisou ne lavo'o vile poonu ilemolu lexe kulisolite mo muxatele tatalusou ne anu lavo'o vile la kaukavuxu vevesinu ilemolu lexe velili mo muxatele tami'asou ne anu lavo'o vile poonu la ilemolu lexe topasi mo mavulovexasou ne anu lavo'o vevesinu ne ilemolu lexe kulisopulasi mo mavulovexa mo mulu'e no lia vile ne lavo'o 'ela'ela ilemolu lexe aiasine xe mavulovexa mo mulu'e no lia ta tameisou ne anu lavo'o malivololoonu ilemolu lexe ametisi. 21Mo aitenga mavulovexa mo mulu'e no lia tamei ne mi'oxo no anu lasala mukalusi mo vote'i sou tuala tatila ne mi'oxonu no anu xoulu e mivile u'unalaxu uasi la ulamilami mo tamalei ulai xalee vile loxo atitilo. 22Xe eni amaisou taasou lalotu vile uxolu no nano no tuala tatila ne uasi xo taasou lalotu ane anu Tila Lataua xaviinu musuku ilou Sipsip 'Olu nesi. 23 nMo no nano no tuala tatila ne la umomomo sou aso ilou so'io ukaa la uasi xo lamanaxu Lataua ukakaa no anu mo Sipsip 'Olu anu telusou. 24 oTa mitema tavu'alo no xalexalee tuatuala ukalusi 'o imuamua'i no anu lamanaxu ne mo ta tatanaanu tuatuala no lia 'o ino'u mimii lailaixe noxi'a la ino'u ine'enu. 25 pMo aitengaxu tuala tatila ne voxo vile utatu uasi ukisi uxoxolu aloxo ne xo 'olovoxo la uasi aso uulualesi. 26Mo tokolomo iouiou ilou lamoli noxi'a ta mitema no xalexalee tuatuala no lia 'o ukalusi ne ino'u u'unalai no anu. 27 qMo susu vile uxolu no nano ne uasi ilo'a ta mitema e i'oxo'oxonu 'ilixo sou maela loxo pakali mo 'ilixo sou vote'i mo to se'i la xe ane'i ane i'oxo'oxonu vaikala kalakalavoi ne umomomo sou i'unalai uasisi manina. Ia ane'i ane ualasi'a uai no nano no anu lavuku sou mauli noxou Sipsip 'Olu ane'isisi i'unalai.
Copyright information for
ATA